थारु संस्कार ओ कोरोना भाईरस

इन्द्रबहादुर चौधरी

कोरोनाभाईरस (कोविड नाईन्टीङ) र्वाग संसार भर फैलल बा । अघट्यक मनै का र्वाग लागल कैख पटा नै पईना सड्ड मुना करट । कौनोजन यी हैजा हो कैख कहट । डक्टर्व से विर्वा नि कराख गुर्वा बैडावा से पाटी बैस्ना, झारफुक कर्ना करट । निक हुईल से हुईना नैट ओसह ओरा जैना करट । आसकाल कसिन र्वाग आईल बा वाकर विर्वा फे नि मिल्ना सुन्जैठा । ई र्वागक नाउ कोरोना भाईरस कठ । चीन ड्यासक एकठो बजार उह्वान कना ठाउँसे ओँर्वा लेलक आव सम संसार भरक ध्यार डेशम फैलल बा । यी र्वाग से पाँचलाख से ध्यार मनै ओरा स्यालक बाट । ओ एक कररोड से ढ्यार संक्रमीट हो स्याकल बाट । ओस्टख हामार लग्घक ड्यास भारटम फे ध्यार मनै ओरा स्याकल बाट । हामा नेपाल फे बरा डरलक्टीक बा । कोरोना से ढ्यार मनै ओरैटी बाट । उह मार नेपाल सरकार से फे यी र्वाग से बचक टे २०७६ साल चैटक ११ गटे से लक डाउन कर्ल बा ।

२०७७ व २०७८ साल बैशाख १७ गतेसे लकडाउन कर्टी आईल बा । हामा नेपालम फे स्वास्थ्य मन्त्रालयसे कोरोना संक्रमनके तथ्याङ्क संकलन कर्टीबाट । यी र्वाग से सड्ड सड् बहरटी बाट । यी र्वाग लागल नि लागल कैख जाँचक टे क्वारेनटन बनाईल बा ओ कोरोना लग्ल से आइसोलेट म ढै ख विरवा करैना कर्ठ । ई र्वाग लग्लसे बचक लाक प्रदेश, स्थानीय तह हुँकन से समन्वय कैख मास्क, साबुन जसिन सामान बँट्ना काम कर स्याकल बा । ओ बच्ना उपायक बारेम सतेटनामूलक सन्डेस फे चलैटी बा । नेपालम और ड्यास से अईलक मनैनम र्वाग भेटगैल बा । यी र्वाग फैल नि डिहकटे आपन आपन घरम बैस्ना, एक मिटर से डुर बैठ्ना, सेनिीटाईजर ले हाठ ढुईना, हाट नि मिलैना, साबनले हाट ढुईना, मु छोप्ना, ढ्वाक सलाम नि लग्ना कल बा । बाजा, नेट, मोवाईलक व्याकटोन मसे फे सन्देश मुलक सूचना कर्टी बा । कोरोना र्वाग लग्लसे कपार बठैना, जर जुरी अईना, हाटग्वारा बठैना, सुखल खोँखी अईना लक्षण रठा कल बा । असिन र्वागम से बँचक लाक सक्कु जन अपन्हे चनाख हुई पर्ठा । होस पुगाई पर्ठा । लक डाउन मन्ना काम बजार मसे फे गाउँ टनिक होलो रह आसकाल झन गाउँम हेलसारी कैख र्वाग बहर्ना डर बा । काजे कलसे खेट्वा बारीम काम करपर्ना, खेट्वम ढान लगैना कर पर्ना, टिना लगाई पर्ना हुईलक ओर्से घर भित्तर केल बैठ्ना कर्रा बा । जसिन ज्या हुईलसे फे सक्कु जन आपन आपन ठाउँ म से हौस्यार हुई पर्ना बा । सरकारक लगाईल नियम मान पर्ना बा । यी आपन टे फे हो आनक टे फे हो ।

यी र्वागक कारन से ठारु जाटम रना ंसंस्कारम भारी असर परल बा । ढ्वासलाम नै लग्ना, आपन मनैन डेक्ख डुर भाग पर्ना, आपन पौन्ही पौन्हन आपन घरम फे नि आई डेना अप्न फे नै जैना कर परल बा । भ्वाजम ध्यार मनै नै जुट्ना, पट्ठलरीम ढ्यारजन जाई नि पैना, पच्चीस जसे ढेर मनै भ्याल हुई नै पैना, भ्याल हुर्यलसे फे दुई मिटरके डुर रख, समाजसे डुर रख रना । कौनो जन मुल से फकल्ना मनै नै पैना । सक्कुजन डरैना । टै टिहार मान नै पैना । जौन टिह्वार फे घरक घरक मिल्ख केल खाई पर्ना । आपन चेलीबेटी निउँटा नै कर्ना हो स्याकल बा । मोटर गारी नै चल्न हुईल ओर्से डुर रहल कविलन्क घर अइना जईना कर नै सेक्ना । ट्याम विर्वन कर नै पाक मुह पर्ना हो स्याकल बा ।आपन मनैन से फे डराई पर्ना अवस्था बा । पह्रना लिख्ना लर्का पर्का सब विस्रा स्याकल अवस्ठा बा । डश कक्षा (एसईई) क परीक्षा नै कराख आपन आपन स्कूलिक तीन सदस्य रहल मूल्याङ्कन समिति बनाख नम्मर पठैना ओ उह अन्सार पास करैना कैख शिक्षा मन्त्रालय कै स्याकल बा । कक्षा ११ क परीक्षा नै करैना कल बा । कक्षा १२ क भरी परीक्षा रोक्ल बा टर कैहा परीक्षा करैना कैख आम्ह निश्चत नै कर्ल हो । लौव पह्राई हुई नै स्याकल हो । सरकार से सरकारी स्कूलहन सामाजिक डुरी कायम कैख नाउँ लिखैना व किताव बँट्ना कर्लबा । कहो कहो रेडियो स्कूल, अनलाईन पह्राई फे हुईटी आईल बा । कोरोना र्वागले सक्कु ओर गरवराईर बा । थारू जाटिन्क संस्कारम बरा असर परल बा । पुर्खासे मन्टी आईल रीटिरीवाज, टैटिहार, मर्नी कर्नी और मेर से कर परल बा । ज्या कलसे फे कोरोनाक विर्वा बनी कलसे हामा संस्कार बँच्ने बा ।

दंगीशरण खबर

प्रतिक्रिया दिनुहोस्

भर्खरै प्रकासित