ड्वासर फ्यारा लौव जिवन पैनु

 

१४ दिनपाछ पि.सि.आर चेक कराईबेर म्वार रिपार्ट नेगेटिभ आईल । रिपोर्ट नेगेटिभ आईल पाछ उहिसे ढ्यार खुशिक बात का हुई सेक्ठा । वाकर मै बखान कर निसेक्टु । महिन उब्याला ड्वासर फ्यारा लौव जीवन पाइलहसक् महशुस
हुइल ।

नविन चौधरी

यिहीसे आघ महि सर्डी निलग्लक् निहो । कोखि लग्ना, नाक बुझ्जीना, ट्वाटा साँक्कीर लग्ना, अस्ट मेह्रिक लक्षण पहिल फे डेखा पर्लक हो । ट असिन मेह्रिक लक्षण डेखापर्लसे हमार थारु गाउँघरम स्वाट्¥या हो कैख कैजाए । खेत्वा, डिह्वाम काम कर्लसे असिन स्वाट्¥या चोखैठा कना मानसिकता बैठल रह । अस्पतालक सटाहा, बेसार पानि, ओ टाटुलमठ पिलसे चोखैठा कना बान रह । उहमार मै फे पहिलक जस्ट जो स्वाट्¥या हो कनाअस लागल । बेसार पानि, टाटुल पानी, पिकचोखाई कना सोचाई ढर्नु । अस्पताल जैना सटाहा घरम बैठाइल मठ पिनु । उहफे महि लग्लक स्वाट्¥या निचुपाईल ।

कोरोना भाइरसक हल्लाखल्ला चलल ब्याला एक हिसाबले कोराना लागल कि कना शंका फे हुईल । ट जसिक तसिक ठम्टी रनहु । चार–पाँच दिन होगिल फे निचुपाईल । उहफे चोखाई कना आसाम कार्यालयक काम ओ और संघ संस्थाककाम फे कर्टी रनु । मनैन्से भेटघाट फे हुईटी रह । दिनप्रतिदिन खोकी लग्टी रना, जर अ‍ैना, स्वाट्¥या लाक्क बोली फे फेरगैलक मार झन महि शंका हुईल । मनमन पक्क फे यी कोराना भाईरस आक्रमण करल हुई कनाअस लागल । यी ब्याला सम जन्नी लर्कापर्का हुकनसे खैना, बैठ्ना अक्कम ह्वाए ।

झन्–झन् समस्या हुईटी गैल पाछ एक फ्यारा चेक कराई परल कना सक्कुन्हक सर सल्लाहपाछ चेक कराए गैनु । एक दिनपाछ रिपार्ट पोजेटिभ आईल । पोजेटिभ आईल पाछ महि झन् डर लागल । उह ब्याला समाचारम ढेन्हक मनै मुलक समाचार फे अ‍ैटी रह । संक्रमणके दर फे बहर्टी रह । कसिक सुरक्षित हुईना ओ घरक मनैन् कसिक बचैना कना चुनौती हुईल । ट याकर बारेम महि थाहा हुईलक मार सक्कु नियम पालना कैख घरक आईशोलेसनम बैस्नु ।

सुरुवात म, महि कोरोनाकहाँसे आक्रमण करल कना थाहा निहुइल । थाहा फे निहुईना रैछ । कार्यालय काम ओ सघ¥यनसे बैस्क गफ गाफ कर्ना जुनहुईटी रह । बैशाख १ गतेक दिन्वा हो । मै ओ म्वार परिवार संग दिनभर रली । दिनभरम कौनो लक्षण डेखानिपरल । ४ बजे ओर हो, अलिक जर ओ नाकमसे स्याप बहल असक करल, जीऊ फे डान–डान बठाईल । बाइकम बैठलकमार असिन हुईठुई कना हुईल ।

टर जस्टक सन्झ्या हुईल ओस्टक हातग्वारा कट्कटी खैना, जीउ बर्चो बठैना, जर अ‍ैना ओ नाकमसे फ्वाङपरस लग्ना लक्षण डेखापर्टी गईल । उ दिन्वा रातभर सुत निसेक्नु । आपन ठे रलक साइनेक्स खाईबेर फे निचुपाईल । द्वासर बिहान अलिक कम हुइलपाछ मेडिकल म जाकबिर्वा लान्क खैनु । कुछु राहातहुइल पाछ फे सर्डी, जुरी अ‍ैना क्रमनिरुकल । दिनप्रतिदिन मुहमक स्वाद, गन्ध फे हेरैटी गैल । कौनो चिजकबास, गन्ध ओ स्वाद फे थाहा निपैना हुईनु । डानडान टिना खाईबेर न्वानक बास थाहा पाउँ । उहफे पचाडरम कनाहुईल । काम फे कर्टी रनु । ट सद्द मही समस्या हुईटी गैल पाछ पि.सि.आर चेक करैनु ।

आईशोलेसनम बैठल ब्याला मै सघ¥यन से भेटघाट कर्ना निकर्नु, ओ परिवारसे छट्ट बैस्नु । नेपाल सरकार ओ विश्व स्वास्थ्य संगठनक नियम पालना कैख आईशोलेसनम बैस्नु । आईशोलेसनम रहल ब्याला आपन स्वास्थ्यक ढर ख्याल करपर्ठा । सबसे खैना ओ पिनाचिजमजा ओ स्वस्थ रहल कलसे हमार इमुनिटिपावरह बह्रैनाकाम करट । जस्टक टाटुल पानी, बेसार पानी, ज्वानो, मरिच, अद्वा, मिलाक पिना, दुध, आँरा, खैना, झ्वार, दालभात खैना, कर्लसे बहुतझट्ट चोखैना म्वार अनुभव बा ।

ओस्टक डक्टर्वनकडिहल बिर्वा फे नियमित रुपम खैना करपरट । असिक छुट्ट बैस्क डाईक, घरक मनैन्हक सहयोग ओ मैयाले फे अलिक कोरोना झट्ट चोखाई अस करल । द्वासर फ्यार १४ दिनपाछ पि.सि.आर चेक कराईबेर म्वार रिपार्ट नेगेटिभ आईल । रिपोर्ट नेगेटिभ आईल पाछ उहिसे ढेर खुशिक बात का हुई सेक्ठा । वाकर मै बखान कर निसेक्टु । लौव जीवन फेर दोस्र पैनु कना महशुस हुईल ।

हमार थारु गाउँघरम ढेर जसो चाडपर्व रना कुलकबिला अ‍ैना, भेटघाट कर्ना हुईलक मार यी ब्यालाम जमघटनि कैख सुरक्षित रना हो । कर्रा कामबाहेक घर भित्तर रना, ओ बहार गैलसे मास्क लगैना, समय समयम साबुनपानीले हात ढुइना, हाठम सेनिटाईजर लगैना करी । यी ब्याला कलक सक्कुजन्ह सुरक्षित रना समय हो । याकरलाग आपन घरम सक्कुजन्ह सुरक्षित बैठ परठ । टब केल हम्र कोरोनासे बैठ सेक्बी । महि डेख परल अस लक्षण और जहन निडेकपर स्याकट, शरिरम कौनो मेह्रिक लक्षण डेखापर्लसे झट्टह अस्पताल जाक विर्वा करैलसे कोरानासे बच सेक्जाईट ।

दंगीशरण खबर

प्रतिक्रिया दिनुहोस्

भर्खरै प्रकासित